På biletet ser vi Central Park. Biletet er henta frå EXPLORIUS si nettside. Sjå fleire bilete frå soft Landing Camp her!
Den 25. august reiser eg til NEW YORK på Soft Landing Camp! Der skal eg vere i tre dagar saman med andre utvekslingstudentar som skal til USA skuleåret 09/10. Før det skal eg jobbe på Helsetunet der eg har fått meg sommarjobb. No er det ikkje lenge igjen, tida går fort. I alle høve sommaren! Eg har ikkje fått turnusplanen for jobben på Helsetunet endå, men eg veit eg skal jobbe frå 25. juni til 30. juli. Eg gledar meg veldig!
Eg har faktisk ikkje hatt ein ordentleg jobb før, med unntak av litt jordbærplukking på Sandane sommaren 2005 eller 2006, men eg kan nesten ikkje kalle det for ein ordentleg jobb. La meg berre seie at eg veit korleis polakkane føler det når dei plukkar bær i jordbæråkeren. Hovudpoenget for meg å ha ein sommarjobb i år, er at eg sparar til kamera (mest sannsynlig Nikon D90) og MacBook. Den PC'en eg har no er tung som ein elefant, og det er ikkje vits å dra den med seg over dammen neste år, også med tanke på overvekt på flyet. Ein Mac er både lett og virusfri, og systemet er veldig enkelt. Men eg seier ikkje meir om det no. Eg veit at det er delte meiningar om dette temaet!
For første gang på veldig veldig lenge skal eg tilbringe heile sommaren HEIME. I min hukommelse har det faktisk aldri skjedd. Pleier alltid å reise vekk i feriane til Sandane eller Voss, og annankvar sommar til utlandet. Men no skal eg tross alt bu i utlandet eit år, så det skade ikkje å vere litt heimeværande. Når eg har vore på sightseeing i New York i tre dagar skal eg vidare til vertsfamilien min i Wabasha, Minnesota. I 10 månader skal eg bu heimefrå. Eg trur ikkje det heilt har gått opp for meg endå, eg gledar meg veldig samtidig som eg er veldig spent. Å snakke engelsk kvar dag i 10 måndar vil gjere meg veldig god i språket, men i byrjinga vil det nok verte litt vanskeleg. Eg har nemleg merka at eg skriv betre enn eg snakkar. Å tenkje er noko heilt anna enn å snakke. Setningane vil liksom ikkje komme ut rett når eg tenkjer høgt.
No byrjar det å bli litt seint, og det er nokre ting eg må ordne før eg legg meg. Eg har ikkje drøymt om USA endå, men kanskje det kjem en liten kortfilm i natt? :)
Ingen kommentarer:
Legg inn en kommentar